Pak më shumë se njëqind ditë më parë, Lando Norris festoi titullin e tij të parë për pilotë në Formula 1. Tani, kampioni në fuqi renditet vetëm i gjashti, me 15 pikë të grumbulluara në tri gara, “viktimë” e një McLaren që nuk është përshtatur në mënyrë të përsosur me rregulloret e reja.

Por, pas podiumit që shoku i tij i skuadrës Oscar Piastri arriti në Suzuka, McLaren premton të kthehet në krye. Sigurisht, diferenca me Mercedes është e madhe, dhe tani ka një pilot në Brackley që mund të bëjë gjithçka: Kimi Antonelli, lider i kampionatit pas fitoreve në Kinë dhe Japoni.

Norris i heq kapelen italianit dhe sipas britanikut, Mercedes ka bërë një punë të jashtëzakonshme me 19-vjeçarin. “Tani ai duhet të provojë se mund të përballojë presionin nga lideri”, tha Norris, që edhe vetë e di se sa i vështirë mund të jetë ky menaxhim.

“Nga viti i parë në të dytin, një pilot bën një hap të madh përpara. Ai ndihet më rehat në çdo aspekt. Për më tepër, Mercedes më është dukur gjithmonë një ekip shumë i mirë në mbrojtjen e pilotëve të tyre, në kujdesin për ta dhe në mbrojtjen e tyre kur është e nevojshme: ata gjithmonë kanë bërë një punë të mirë në këtë drejtim”, shpjegoi kampioni i botës.

Më tej, Norris komentoi: “Kimi gjithashtu duket si një djalë i thjeshtë, i cili është shumë i përkushtuar ndaj punës së tij dhe kjo është pozitive. Në vitin e tij të dytë, ai tashmë po lufton për kampionatin, mendoj se kjo tregon se sa i mirë është”.

“Tani ai ka mundësinë të luftojë për ‘pole position’, fitore dhe titullin. Ai ka një sfidë të madhe përpara, por tani për tani ai duket shumë i aftë. Jam vërtet i emocionuar të shoh se si do të shkojë”, shtoi Norris.