Pilotët e MotoGP kanë kritikuar idenë që nga sezoni 2027 çdo garues të ketë vetëm një motor në dispozicion gjatë fundjavës së garës.

MotoGP po shqyrton ndryshimin e rregullores për të ulur kostot, duke kaluar nga dy motorë për pilot në vetëm një. Megjithatë, shumica e pilotëve janë kundër këtij propozimi.

Pedro Acosta e cilësoi idenë “shumë të keqe”, duke paralajmëruar se një rrëzim në stërvitje apo kualifikuese mund t’i japë fund menjëherë fundjavës së një piloti. Ai theksoi se ekipet kanë nevojë për një motor rezervë në raste emergjente.

Edhe Luca Marini kundërshtoi planin, duke thënë se përdorimi i motorit të dytë pas një rrëzimi është pjesë e spektaklit të MotoGP. Sipas tij, ndryshimi nuk do të sillte kursime të mëdha financiare.

Fabio Quartararo shtoi se gara “flag-to-flag” do të bëhej shumë më e vështirë pa motor rezervë, ndërsa Jorge Martin deklaroi se preferon të vazhdojë me dy motorë, edhe pse vendimi final nuk varet nga pilotët.

Ndryshe nga shumica, Joan Mir u shpreh më i hapur ndaj idesë, duke kujtuar se edhe në Moto2 dhe Moto3 pilotët garojnë vetëm me një motor.